Viwanja 12 vya kombe la dunia Brazil 2014

Viwanja 12 vya kombe la dunia Brazil 2014

Mechi ya fainali ya Kombe la Dunia nchini Brazil itapigwa kwenye Uwanja wa Maracana, Julai 13, 2014.

Lakini, uwanja huo wa kihistoria ni moja ya viwanja 12 katika miji 12 tofauti itakayotumika kwa ajili ya fainali hizo za soka zitakazoshuhudia timu 32 zikimsaka mbabe  mmoja wa Dunia.

Sports4lifetz inakupatia  viwanja vyote 12 vitakavyotumika kwenye fainali hizo za Kombe la Dunia ambazo zitaanza rasmi Juni 12 mwakani kwa mechi ya Brazil dhidi ya Croatia itakayopigwa kwenye Uwanja wa Arena Corinthians jijini Sao Paulo.

1.Uwanja: Maracana  Jiji: Rio de Janeiro  Uwezo: Watazamaji 73,531

Rio de Janeiro ni jiji la aina yake Brazil na hakika Uwanja wa Maracana una historia ya kipekee katika soka la Dunia. Maracana ilijengwa upya kwa ajili ya fainali za Kombe la Dunia mwaka huu. Ulifunguliwa Juni mwaka huu kwa mechi ya kirafiki kati ya Brazil na England.

Ndiyo uwanja utakaotumika kwa fainali Julai 13 , mandhari yake nzuri ndicho kitu kinachovutia zaidi kwenye mji huo kutokana na kuwa na fukwe safi na vivutio vingine vya kitalii kama Mlima wa Sugar Loaf na Sanamu ya Christ the Redeemer.

Maracana ulitumiwa kwenye mechi ya fainali ya Kombe la Dunia 1930, ambapo mashabiki 200,000 waliingia na kuishuhudia Uruguay ikiichapa Brazil

2.Uwanja: Arena Corinthians  uko Jijini Sao Paulo una Uwezo: Watazamaji 65,000

Sao Paulo ni mji unaosifika kuwa ndipo soka ilipozaliwa kwa nchi ya Brazil, lakini hali ya hewa yake imekuwa tatizo kidogo.

Mji huo wa Kusini Mashariki unafahamika kama Terra da Garoa kutokana na mvua kunyesha mara kwa mara.

3. Uwanja: Estadio Nacional Mane Garrincha Jiji: Brasilia Uwezo: Watazamaji 68,009

Jina la uwanja huo limetokana na nyota wa zamani wa Botafogo na Brazil, Garrincha, ambaye alikuwa mmoja wa wanasoka mahiri kabisa nchini huko katika miaka ya 1950 na 1960.

Uwanja huo mpya ulitumika kwenye mechi ya ufunguzi ya Kombe la Mabara. Brasilia ni jiji lenye wasanifu wengi wa miundombinu. Ulianza kutambulika kama mji mkuu wa Brazil badala ya Rio de Janeiro mwaka 1960.

4. Uwanja: Estadio Castelao Jiji: Fortaleza Uwezo: Watazamaji 58,704

Uwanja huo ambao utatumika kwa mechi ya pili ya Brazil ya hatua ya makundi umeandaliwa kwa kipindi cha miaka miwili kwa ajili ya kutumika kwa fainali hizo za Kombe la Dunia. Fortaleza, mji uliopo Kaskazini Mashariki mwa Brazil ni mjii wa mkuu wa kitongoji cha Ceara.

Fortaleza ni maarufu kwa utalii, fukwe nzuri na vyakula vya aina yake na unatajwa kuwa na hali ya Kitropiki.

5. Uwanja: Estadio Mineirao Jiji: Belo Horizonte

Uwezo: 57,483

Ni uwanja utakaotumika kwa mechi ya nusu fainali na ni uwanja uliokamilika kwa wakati mara tu Brazil ilipotajwa kuwa mwenyeji wa fainali za Kombe la Dunia 2014.

Straika wa zamani wa Brazil, Ronaldo aling’ara kwenye uwanja huo wa Mineirao wakati alipoanza soka lake katika Klabu ya Cruzeiro.

Upo umbali wa mwendo wa saa moja kutoka Rio de Janeiro na ni mji usio na gharama kubwa kwa mashabiki wa kigeni.

6. Uwanja: Estadio Beira-Rio

Jiji: Porto Alegre

Uwezo: 48,849)

Uwanja huo upo kando ya Mto Guaiba. Unatumika kama uwanja wa nyumbani wa klabu mbili maarufu za Internacional na majirani zao Gremio. Porto Alegre ni mji wenye mvua kipindi cha Juni na Julai na visiwa na kimojawapo ni Lago de Patos kilichozungukwa na miti karibu milioni moja.

7.Uwanja: Arena Pernambuco

Jiji: Recife

Uwezo: Watazamaji 44,248

Jiji la Recife, lipo kwenye Pwani ya Kaskazini Mashariki ya Brazil, ulitumika mara ya mwisho katika mechi ya Kombe la Dunia 1950. Kwa sasa umejengwa upya na unatumiwa na klabu tatu zenye historia ya kipekee Brazil za Nautico, Santa Cruz na Sport. Wakazi wake ni vichaa wa soka.

Recife ni mji mkuu wa Pernambuco ni muhimu sana kwa uchumi wa Brazil.

8.Uwanja: Arena Fonte Nova

Jiji: Salvador

Uwezo: Watazamaji 52,048

Uwanja huo utashuhudia mechi sita kwenye fainali hizo. Waandaaji wanasema uwanja huo mpya umejengwa kisasa na una migahawa, makumbusho za soka, maduka, hoteli na kumbi za sherehe.

9. Uwanja: Arena Pantanal

Jiji: Cuiaba

Uwezo: Watazamaji 42,968

Uwanja huo uliboreshwa kwa ajili ya fainali za Kombe la Dunia na utatumika kwa ajili ya mechi nne. Uwanja huo upo kwenye mji wa Cuiaba uliopo Magharibi mwa Brazil, Kusini mwa misitu ya Amazon.

Mji huo unafahamika kama ‘Green City’ na ni maarufu kwa utalii licha ya kwamba kwa kipindi cha Juni hadi Julai hali ya hewa inakuwa tatizo kutokana na joto kufikia nyuzi 40.

10. Uwanja: Arena Amazonia

Jiji: Manaus

Uwezo: Watazamaji 42,374

Kama jina la uwanja huo linavyosomeka, Manaus ipo katikati ya misitu ya Amazon. Manaus si mahali pazuri sana kwa soka, lakini waandaaji wa Kombe la Dunia waliamua michuano hiyo ifanyike kila kona ya nchi ya Brazil licha ya kwamba uwanja huo unaweza kuwa bustani ya wanyama michuano itakapokwisha.

11. Uwanja: Estadio das Dunas

Jiji: Natal

Uwezo: Watazamaji 42,086

Uwanja huo umemalizika kujengwa kwa ajili ya Kombe la Dunia. Estadio das Dunas utatumika kwa mechi nne za makundi katika fainali hizo. Natal ni mji unaofahamika kama Cidade do Sol (Sun City) kwa sababu umekuwa na joto linalokaribia nyuzi 28. Fukwe zilizopo Kaskazini Mashariki mwa jiji hilo zinaifanya jiji hilo lizidi kupendeza.

12. Uwanja: Arena da Baixada

Jiji: Curitiba

Uwezo: Watazamaji 41,456

Uwanja huo wa Arena da Baixada kwa mara ya kwanza ulijengwa 1914, lakini ulifanyiwa ukarabati mwaka 1999 na ulirekebishwa zaidi baada ya Brazil kuchaguliwa kuwa mwenyeji wa fainali za Kombe la Dunia 2014.

Curitiba ni mji wa aina yake ndani ya Brazil na unatajwa kuwa na uchumi mkubwa. Hali yake ya hewa inafanana na Rio de Janeiro na Belo Horizonte.

Chanzo; World Stadium Database na Mwanaspoti.